Ukiumoortumik nalunaarut 2019
Kalaallit Airportsip 2019-imut ukiumoortumik nalunaarusiaa, suliassat killiffii aamma 2020-mi ataatsimeersuarnissaq pillugu tusagassiorfinnut nalunaarut
Kalaallit Airports Holding A/S-imut ukiumoortumik nalunaarusiaq ulloq 11. marts 2020 siulersuisunit akuerineqarpoq, aammalu ulloq 18. maj 2020 nalinginnaasumik ataatsimeersuarnermi akuerineqartussatut inassutigineqarluni.
Ingerlatsinermi angusat suliffissuarmut tamarmiusumut 28,3 mio. koruuninik amigartooruteqartoq takutitsipput, taakkua 2018-imi 9,5 mio. koruuniusimallutik, aammalu ukiup naanerani nammineq aningasaatit 1.281 mio. koruuniupput. Amigartoorutit pingaartumik suliaqarnerup ingerlanneqareersup nalingata nalikillilerneqarnera pissutigalugu Kalaallit Airports Domestic A/S-imi 14 mio. koruuninik amigartooruteqarnermeersuupput, aammalu Kalaallit Airports International A/S-imi 11 mio. koruuninik ingerlatsinermi amigartooruteqarnermeersuullutik, tamannalu missingersuutit iluanniippoq.
Amigartoorutit siornamut sanilliullugu qaffassimanerat ilaatigut suliffissuarmi ingerlatat annertunerusimanerannut, ilaatigut ukiumi siusinnerusumiittumi suliaqarnerup ingerlanneqareersup nalingata nalikillilerneqarsimanerata, aammalu ilaatigut Qaqortumi mittarfimmi aningaasaliinerit ingerlaavartumik aningaasartuutitut allanneqartarsimanerannut, takussutissaavoq.
Suliassat killiffii
Pingasunik mittarfiliorluni suliaqarneq ingerlallualeruttorpoq, aammalu 2019-imi katillugit 404 mio. koruunit missaannik aningaasaliisoqarpoq, taakkunannga annertunerpaartaat Nuummi aningaasaliissutaallutik.
Jóhannus Egholm Hansen oqarpoq: ”2019-imi suliassat siumut ingerlanerat siulersuisut naammagisimaarpaat, aammalu 2020-imi (i) Qaqortumi sanaartornermik suliassat, (ii) mittarfinni pingasuni tamaginni mittarfiit illutassaasa, aamma (iii) teknikkimut atortut, ilanngullugit mittarfinni pingasuni tamaginni atortut assakaasullit, neqeroortitsivigineqarnissaasa pilersaarutigineqartup naammassinissaa qilanaaralugu, taamaalillutik aqutsisut siunissami mittarfiit ingerlanneqarnissaannut aammalu atuilereernerup kingorna mittarfinnik niuernikkut ineriartortitsinissamut sammisunut piareersarnissamut aallussinerulersinnaassallutik. 2020-imi aningaasaliinerit tamarmiusut 800 mio. koruunit missaannik annertussuseqassasut naatsorsuutigineqarpoq.”
Nuummi mittarfinnut tunngatillugu neqeroortitsineq Munck Gruppen-imit ajugaaffigineqarpoq aammalu nalliuttorsiorpalaartumik qaartitsineq siulleq ulloq 16. oktober 2019 ingerlanneqarpoq. Munck gruppen aamma Ilulissani mittarfimmi neqeroortitsineq ajugaaffigaa, tassani suliaqarneq 2020-imi aallartinneqartussaalluni.
Qaqortumi mittarfimmut sanaartornermut suliassat 2020-ip aallartinnerani neqeroortitsivigalugit nassiunneqarput, aammalu 2020-imi qaammatit pingasukkaat aappaanni entreprenøri ajugaasoq isumaqatigiissuteqarfigineqassasoq siunnerfigineqarpoq.
Illoqarfinni pingasuni taakkunani mittarfiit illutassaannut atugassiinissamut siunnersuutit suliarineqareerput, aammalu mittarfiit illutassaannut tamakkiisumik sanaartugassamut akigititassanut neqeroortitsinissaq maj - juni 2020 aallartinneqassasoq naatsorsuutigineqarluni. Neqeroortitsineq neqerooruteqaqqusilluni suliariumannittussarsiuussinertut pissaaq, tassani Kalaallit Nunaanni, Danmarkimi, Savalimmiuni aamma Islandimi entreprenørit toqqakkat arlallit neqerooruteqaqquneqarlutik.
Ataatsimeersuarnissaq
Nalinginnaasumik ataatsimeersuarneq 18. maj 2020 ingerlanneqassaaq. Covid-19 nunarsuarmi tuniluunnerata malitsigisaanik killilersuinerit atuutsinneqalersut tunngavigalugit, ataatsimeersuarneq, Naalakkersuisut isumaqatigiissuteqarfigalugit, takkulluni ataatsimiigiarani ingerlanneqassaaq. Tusagassiortut aamma soqutiginnittut allat ataatsimeersuarnissaq sioqqullugu ingerlatseqatigiiffimmut saaffiginnillutik aggersaaneq oqaluuserisassanik ilaqartoq kiisalu naatsorsuutit nassiutsissinnaavaat, aammalu ataatsimeersuareernermi siulersuisut nalunaarutaat nassiutsissinnaallugu. Ataatsimeersuarnermit imaqarniliaq ingerlatseqatigiiffiup nittartagaani tamanut saqqummiunneqassaaq.
Paasissutissat annertunerusut
Apeqqutissaqaraanni pisortaaneq Peter Wistoft uani +45 25 42 40 33 mail: peter@kair.gl saaffigineqarsinnaavoq